Gjithnjë e më shpesh vizitoj gra dhe burra të çdo moshe që paraqiten me çrregullime funksionale intestinale. Kur zorra nuk funksionon siç duhet, e gjithë jeta ndikohet negativisht, sepse zorra nuk është thjesht një organ tretës, por një qendër kyçe metabolike, hormonale, imunitare dhe psiko‑emocionale e organizmit.
Brenda zorrës ekziston një “organ” tjetër thelbësor: mikrobioma intestinale. Kur ushqehemi, nuk jemi kurrë vetëm – çdo vakt ushqen jo vetëm qelizat tona, por edhe komunitetin mikrobik që jeton në zorrë.
Zorra e njeriut modern është biologjikisht e njëjtë me atë të njerëzve të epokës së gurit. Ajo që ka ndryshuar ndjeshëm është ushqimi dhe stili i jetesës. Me ndryshimin e dietës, veçanërisht me reduktimin e fibrave bimore (perime dhe fruta) dhe rritjen e ushqimeve të përpunuara, janë shtuar ndjeshëm çrregullimet funksionale dhe patologjitë intestinale.
Në praktikën time klinike kam vërejtur se shumë persona me probleme intestinale nuk janë të informuar për praninë e metanit dhe hidrogjenit në frymëmarrje.
Hidrogjeni (H₂) dhe metani (CH₄) janë gaze që prodhohen në zorrë nga mikroorganizmat intestinalë dhe eliminohen më pas përmes ajrit të nxjerrë gjatë frymëmarrjes. Trupi i njeriut nuk i prodhon vetë këto gaze dhe, në kushte fiziologjike normale, ato nuk duhet të jenë të pranishme në ajrin e nxjerrë.
Prania e metanit dhe hidrogjenit në frymëmarrje përfaqëson një shenjë të plakjes biologjike të organizmit dhe të mikrobiomës intestinale. Me kalimin e viteve, mikrobioma ndryshon dhe “plaket”, një proces që përshpejtohet nga një ushqyerje e varfër në fibra bimore.
Një mikrobiomë e ndryshuar ndikon negativisht në të gjithë organizmin, duke shkaktuar përkeqësim strukturor dhe funksional, përfshirë edhe sistemin nervor, pra shëndetin mendor. Fatkeqësisht, shpesh trajtohen vetëm simptomat intestinale pa u analizuar shkaku biologjik i tyre.
Prania e metanit në zorrë shoqërohet shpesh me kapsllëk, dhimbje barku dhe fryrje abdominale (meteorism). Në këto raste, mikrobioma nuk prodhon në mënyrën e duhur metabolitë mbrojtës dhe aktivë, si acidet yndyrore me zinxhir të shkurtër, vitamina dhe molekula të tjera esenciale për shëndetin intestinal.
Personat me prodhim të shtuar të metanit kanë tendencë të akumulojnë yndyrë trupore, pasi metani mund të ndikojë negativisht në funksionin mitokondrial dhe të pengojë beta‑oksidimin e acideve yndyrore.
Metani ndikon gjithashtu në nervin vagus, një strukturë kyçe për vitalitetin, balancën emocionale dhe funksionin autonom, duke kontribuar në shfaqjen e ankthit dhe simptomave depresive.
Metani prodhohet nga mikroorganizma të veçantë të quajtur Arkea, të cilët jetojnë në mjedise pa oksigjen. Këta mikroorganizma janë forma shumë të lashta jete, që i përkasin një epoke parahistorike, kur jeta bimore, shtazore dhe njerëzore nuk ekzistonte ende.
Brenda zorrës sonë ekziston një mjedis që i ngjan atmosferës primitive të Tokës. Zorra përmban hidrogjen, metan, dioksid karboni dhe sasi shumë të ulëta oksigjeni, duke lejuar jetesën e mikroorganizmave anaerobë (të cilët jetojnë në mungesë të oksigjenit).
Përballë pacientëve me çrregullime funksionale dhe patologji intestinale, ku dyshohet prania e metanit në frymëmarrje, rekomandohet kryerja e Breath Test-it SIBO. Nëse testi rezulton pozitiv, aplikohet një terapi e targetuar dhe një regjim ushqimor i personalizuar, i përshtatur sipas nevojave dhe specifikave individuale.
Njohuria është hapi i parë drejt shëndetit.
PHD. MD. ALBANA DAKA
Leave a comment